NA મંજૂરીમાં હેરાનગતિ? ગુજરાત હાઇકોર્ટનો મહેસૂલ અધિકારીઓને કડક આદેશ! 

ગુજરાતમાં જમીન ધરાવતા નાગરિકો માટે બિનખેતી (NA) પરવાનગી મેળવવી એ કોઈ અગ્નિપરીક્ષાથી કમ નથી. કાયદાકીય નિયમો સ્પષ્ટ હોવા છતાં, જિલ્લા કલેક્ટર અને રેવન્યુ અધિકારીઓ દ્વારા નાની-નાની અને તુચ્છ બાબતોને આગળ ધરીને અરજીઓ દફતરે કરી દેવામાં આવે છે. તાજેતરમાં ગુજરાત હાઇકોર્ટે આ જ મુદ્દે લાલ આંખ કરી છે અને મહેસૂલી તંત્રને સખત સૂચનાઓ આપી છે.

કાયદો શું કહે છે અને વિવાદ શું છે?

બોમ્બે લેન્ડ રેવન્યુ કોડ, 1879 ની કલમ 65 મુજબ જિલ્લા કલેક્ટર પાસે માત્ર જમીન બિનખેતી કરવાની સત્તા છે. કલેક્ટરને જમીનના ટાઈટલ ચેક કરવા કે બિનજરૂરી વિવાદ ઊભો કરવાની સત્તા નથી. પરંતુ તાજેતરના એક કેસમાં (જ્યાં જામનગર કલેક્ટરે સિવિલ સૂટ પેન્ડિંગ હોવાનું કારણ ધરીને અરજી રદ કરી હતી), હાઇકોર્ટે સ્પષ્ટ કર્યું કે જો કોઈ મનાઈ હુકમ (Stay Order) કે સ્ટેટસ કો નથી, તો માત્ર સિવિલ કેસ ચાલતો હોવાના બહાને NA અરજી ના મંજૂર કરી શકાય નહીં.

હાઇકોર્ટની લાલ આંખ અને સવાલો

જસ્ટિસ નીરલ મહેતાની ખંડપીઠે સુનાવણી દરમિયાન મહત્વપૂર્ણ અવલોકનો કર્યા:

• સરકારી ઠરાવ મોટો કે કાયદો? હાઇકોર્ટે વેધક સવાલ કર્યો કે શું કોઈ આંતરિક સરકારી ઠરાવ કે વહીવટી સૂચના કાયદાની જોગવાઈઓ અને હાઇકોર્ટના આદેશો કરતાં મોટી ગણી શકાય?

• વારંવારનું લિટિગેશન: કલેક્ટરોના મનમાનીભર્યા નિર્ણયોના કારણે સામાન્ય નાગરિકોને ૩ કે તેથી વધુ રાઉન્ડના કોર્ટ કેસો (લિટિગેશન) કરવા પડે છે, જેનાથી અદાલતો પર પણ બિનજરૂરી ભારણ વધે છે.

• અધિકારીઓની તાલીમ અને સંવેદનશીલતા: હાઇકોર્ટે મહેસૂલ વિભાગના અધિક મુખ્ય સચિવને આદેશ આપ્યો છે કે તેઓ આ બાબતમાં હસ્તક્ષેપ કરે અને અધિકારીઓને યોગ્ય તાલીમ તથા સંવેદનશીલતા પૂરી પાડે.

આ કેસની વધુ સુનાવણી આગામી તારીખે હાથ ધરવામાં આવશે, જ્યાં રેવન્યુ વિભાગે તમામ અમલી ઠરાવો રેકોર્ડ પર રજૂ કરવા પડશે.

Youtue video Link:- https://www.youtube.com/watch?v=NDxduGgGEAo